شاه داغیم چال پاپاغیم ایل دایاغیم شانلی سهند´یم
باشی طوفانلی سهند´یم
باشدا حییدر بابا تک قارلا قیروولا قاریشیب سان
سون ایپک تیللی بولودلارلا اوفوقده ساریشیب سان
ساواشارکن باریشیب سان
گؤیدن ایلهام آلالی سیرری سماواتا دییه رسه ن
هله آغ کورکو بورون یازدا یاشیل دون دا گییه رسه ن
قورادان حالوا یییه رسه ن
دؤشلرینده سونالار سینه سی تک شوخ ممه لرده
نه شیرین چیشمه لرین وار
او یاشیل تیللری ییل هؤرمه ده آینالی سحه رده
عشوه لی ایشمه لرین وار
قوی یاغیش یاغسا دا یاغسین
سیل اولوب آخسا دا آخسین
یان لاریندا دره لر وار
قوی قلمقاش لارین اوچسون فره لرله هامی باخسین
او اتک لرده نه قیزلار یاناغی لاله لرین وار
قوزولار اوتلایاراق نی ده نه خوش ناله لرین وار
گول چیچکدن بزه ننده نه گلین لر کیمی نازین
ییل اسنده او سولاردا نه درین راز و نیازین
تیتره ییر ساز تیلی تک شاخه لرین چایدا - چمنده
ییل او تیل لرده گزه نده نه کوراوغلو چالی سازین
اؤرده گین خلوت ایدیب گؤلده پری لرله چیمنده
قول-قاناددان اونا آغ حوله آچار غمزه لی قازین
هله نوروز گولی وار قار چیچگین وار گله جکلر
سیل - یاغشیدا یویونارکن ده گونش له گوله جکلر
قیشدا کهلیک هوسیله چؤله قاچدیقدا جوان لار
قاردا قاققیلدایاراق نازلی قلمقاش لارین اولسون
یاز او دؤش لرده ناهار منده سین آچدیقدا چوبان لار
بوللو سودلو سورولر دادلی قاووتماش لارین اولسون
آد آلیب سندن او شاعیر کی سن اوندان آد آلارسان
اونا هر داد ویره سه ن یوز او مقابل داد آلارسان
آداش اولدوقدا سن اونلا داها آرتین اوجالارسان
باش اوجالدیقدا دماوند داغیندان باج آلارسان
او دا شعرین ادبین شاه داغیدر شانلی سهندی
او دا سن تک آتار اولدوزلارا شعر ایله کمندی
او دا سیمرغدن آلماقدادی فندی
شعر یازاندا قلمیندن باخاسان درسپه لندی
سوز دینده گوروسن قاتدی گولی پسته نی قندی
او نه شاعر کی داغین وصفینه مصداق اونی گوردوم
من سنین تک اوجالیق مشقینه مشاق اونی گوردوم
عشقه عشق اهلینه مشتاق اونی گوردوم
او نه شاعر کی خیال مرکبینه شووشیغایاندا
او نهنگ آت آیاغین توزلی بولودلاردا قویاندا
لوله لنمکده دی یر گوی نجه طومار ساریاندا
نه زمان وارسا مکان وار ساکسیب بیچدی بیر آندا
کچه جکلر گله جکلر نه بویاندا نه اویاندا
باخ نه حرمت وار اونون اوز دمیشی توک پاپاغیندا
شعرینین تاجی اگیلمیش باشی دورموش قاباغیندا
باشینا ساوریلان اینجی چارلیق اولموش آیاغیندا
وحی دیر شعری ملکلردی پیچیلدیر قولاغیندا
او دا داغلار کیمی شانینده نه یازسام یاراشاندیر
او دا ظالم قوپاران قارلا کولکله دوروشاندیر
قودوزا ظالمه قارشی سینه گرمیش ووروشاندیر
قودوزون کورکونه ظالم بیره لر تک داراشاندیر
اما وجهینده فقیر خلقی اگیلمیش سوروشاندیر
قارا ملتده هنر بولسا هنرله آراشاندیر
گیجه حقین گوزودیر طور تورتمیش اوجاغیندا
اریییب یاغ تک اورکلردی یانیرلار چراغیندا
می محبتدن ایچیب لاله بیتیبدیر یاناغیندا
او بیر اوغلان کی پری لر سو ایچرلر چاناغیندا
طبعی بیر سوگلی بولبول کی اوخور گول بوداغیندا
سولار افسانه دی سؤیلر اونون افسونلی باغیندا
شاعرین ذوقی نه افسونلی نه افسانه لی باغلار
آی نه باغلار کی الف لیلی ده افسانه ده باغلار
شاعرین عالمی اولمز اونا عالمده زوال یوخ
آرزولار اوردا نه خاطرلیه امکاندی محال یوخ
باغ جنت کیمی اوردا بو حرامدیر بو حلال یوخ
اوردا حالدیر داها قال یوخ
گیجه لر اوردا گوموشدندی قیزیلدان نه گونوزلر
نه زمرد کیمی باغلاردی نه مرمر کیمی دوزلر
نه ساری تیللی اینکلر نه آلاگؤزلو اوکوزلر
گول آغاجلاری نه طاووس کیمی چترین آچیب الوان
حله کروانیدی چؤللر بزه نر سورسه بو کروان
دوه کروانی دا داغلار یوکی اطلسدی بو حیوان
صابرین شهرینه دوغرو قاطاری چکمه ده سروان
اوردا قار دا یاغار اما داها گوللر سولا بیلمز
بو طبیعت او طراوتده محالدیر اولا بیلمز
عمر پییمانه سی اوردا دولا بیلمز
او افق لرده باخارسان نه ده نیزلر نه بوغازلار
نه پری لر کیمی قولار قونوب-اوچماقدا نه قازلار
بالیق اولدوز کیمی گؤل لرده ده نیزلرده پاریلدار
آبشار مرواری سین سیل کیمی تؤکدوکده خاریلدار
قصرلر واردی قیزیلدان قالالار واردی عقیق دن
رافایل تابلوسی تک صحنه لری عهد عتیق دن
جننتین باغ لاری تک باغلاری نین حورو قصوری
دوزولوب غرفه ده ایواندا جواهر کیمی حوری
الده حوری لرینین جام بلوری
تونگونون گول کیمی صهبای طهوری
نه ماراقلار کی آییق گؤزلره رؤیادی دییرسن
نه شفقلر کی درین باخمادا دریادی دییرسن
اویدوران جنت مأوادی دییرسن
زهره نین قری بریلیان حصاری اینجی دی یاقوت
قصر جادودی مهندسلری هاروت ایله ماروت
اوردا مانی دایانیب قالمیش او صورتلره مبهوت
اوردا شعرین موزیکون منبعی سرچشمه دی قاینار
نه پری لر کیمی فواره دن افشان اولوب اوینار
دولو مهتاب کیمی استخردی فواره لر ایله
ملکه اوردا چیمیر آی کیمی مهپاره لر ایله
شعر و موسیقی شاباش اولمادا افشاندی پریشان
سانکی آغ شاهی دیر اولماقدا گلین باشینا افشان
نه گلینلر کی نه انلیک اوزه سورترله نه کیرشان
آغ پری لر ساری کؤینکلی بولودلاردان انیرلر
سود گؤلونده ملکه ایله چیمیرکن سیوینیرلر
قووزایاندا هره الده دولو بیر جام آپاریلار
سانکی چنگی لره شاعرلره الهام آپاریرلار
دریا قیزلارینا پیغام آپاریرلار
ده نیزین اؤرتوگو ماوی افقون سقفی سماوی
آینا دیر هر نه باخیرسان ییر اولوب گؤی له مساوی
غرفه لر آی بولود آلتیندا اولار تک گؤرونورلر
گؤز آچیب-یومما چیراغ لار کیمی یاندیقدا سؤنورلر
صحنه لر چرخ فلک تک بورولوب گاه دا چؤنورلر
زهره ایواندا الهه شینلینده گؤرونرکن
باخاسان حافظی ده اوردا جلالت له گؤررسن
گاه گؤرن حافظ شیراز ایله ایواندا دوروبلار
گاه گؤرن اورتادا شطرنج قورارکن اوتوروبلار
گاه گؤرن سازیله آوازیله اگلنجه قوروبلار
خاجه الحان اوخویاندا هامی ایشدن دایانیرلار
او نوالرله پری لر گاه اویوب گاه اویانیرلار
لاله لر شعله سی الوان شیشه رنگی بویانیرلار
قاناد ایستیر بو افق قوی قالا طرلانلی سهند´یم
ایشید اؤز قصه می دستانیمی دستانلی سهند´یم
سنی حیدر بابا اول نعره لر ایله چاغیراندا
او سفیل داردا قالان تولکو قووان شیر باغیراندا
شیطانین شیللاغا قالخان قاطیری نوخدا قیراندا
دده قورقود سسین آلدیم دیدیم آرخامدی ایناندیم
آرخا دوردوقدا سهندیم ساوالان تک هاوالاندیم
جوشغونون دا قانی داشدی منه بیر هایلی سس اولدو
باکی داغلاری دا های ویردی سسه قیها اوجالدی
او تایین نعره لری سانکی بو تایدان دا باج آلدی
راحمین نعره سی قووزاندی دین توپلار آتیلدی
رستمین توپلاری سسلندی دیین بوملار آچیلدی
قورخما گلدیم دیه سسلرده منه جان ددی قارداش
یاشا اوغلان سیزه داغدان دلی جیران ددی قارداش
ایل سیزه قافلان ددی قارداش
داغ سیزه اصلان ددی قارداش
داغلی حیدربابانین آرخاسی هر ییرده داغ اولدی
آرازیم آینا چراغ قویمادا آیدین شافاغ اولدی
او تایین نغمه سی قووزاندی اورکلر قولاغ اولدی
ینه قارداش دیرک قاچمادا باشلار آیاغ اولدی
قاچدیق اوزلشدیک آرازدا ینه گؤزلر بولاغ اولدی
ینه قارداش سایاغی سؤزلریمیز بیر سایاغ اولدی
وصل ایگین آلمادا ال چاتمادی عشقیم داماغ اولدی
هله لیک غم سارالارکن قارالار دؤندی آغ اولدی
آرازین سود گولی داشدی قایالیقلاردا باغ اولدی
ساری سونبوللره زلف ایچره اوراخلار داراغ اولدی
یونجالیقلار ینه بلدرچینه یای یاز یاتاغ اولدی
نه صول اولدی نه صاغ اولدی
ایلیمی آرخامی گؤردیکده ظالم اووچوقیسیلدی
سیل کیمی ظلمی باسیلدی زینه آرخ اولدی کسیلدی
تور قوران اووچی آتین قوومادا سیندی گری قالدی
اما حیدربابا دا بیلدی کی بیز تک هامی داغلار
باغلانیب قول قولا زنجیرده بولودلار اودیر آغلار
نه بیلیم بلکه طبیعت اوزی نامرده گون آغلار
اگری یوللاری آچارکن دوز اولان قوللاری باغلار
داغلارین هر نه قوچی طرلانی جیرانی مارالی
هامی دوشگون هامی پوزغون سینه لر داغلی یارالی
اما ظن اتمه کی داغلار ینه قالخان اولاجاقدیر
محشر اولماقدادی بونلار داها ولکان اولاجاقدیر
ظلم دنیاسی یانارکنده تیلیت قان اولاجاقدیر
ددین آذر ایلینین بیر یارالی نیسگیلی یم من
نیسگیل اولسام دا گولوم بیر ابدی سوگلی یم من
یاد منی آتسا دا اوز گلشنیمین بولبولی یم من
ایلیمین فارسیجادا دردینی سؤیلر دیلی یم من
حقه دوغرو نه قارانلیق ایسه ایل مشعلی یم من
نیسگیل اول چرچیه قالسین کی جواهر نه دی قانمیر
مدنیت ده بین ایلیر بدویت بیر اوصانمیر
گون گدیر آز قالا باتسین گیجه سیندن بیر اویانمیر
آتار انسانلیغی اما یالان انسانی آتانماز
فتنه قووزانماسا بیر گون گیجه آسوده یاتانماز
اما مندن ساری سن آرخایین اول شانلی سهندیم
من داها عرش علا کؤلگه سی تک باشدا تاجیم وار
الده موسی کیمی فرعونه غنیم بیر آغاجیم وار
من علی اوغلویام آزاده لرین مردی مرادی
باشدا سینماز سپریم الده کوتلمز قلجیم وار
